قالا مەن اۋىل اراسىنداعى اقپاراتتىق الشاقتىق ازايىپ, ەندى ەلىمىزدەگى شالعاي ەلدى مەكەن تۇرعىندارى تەلەارنا حابارلارىن جوعارى ساپامەن كورە باستايدى. سونىمەن قاتار اۋىلدىقتار بۇرىنعىداي 3-4 ارنا ەمەس, 15 ارناعا ابونەنتتىك وتەماقىسىز قول جەتكىزبەك. بۇل جۇمىس تەلەراديو حابارلارىن تاراتۋدى تسيفرلى جۇيەگە كوشىرۋدىڭ ارقاسىندا جۇزەگە اسىرىلماقشى.
تەلەكوممۋنيكاتسيا نارىعىنا ۇلكەن وزگەرىستەر اكەلگەن تسيفرلاندىرۋ پروتسەسى بۇگىنگى كۇنى الەمنىڭ كوپتەگەن ەلىندە جۇزەگە اسىرىلۋ ۇستىندە. سول كوشكە قوسىلعان قازاقستان دا قازىرگى ۋاقىتتا ەفيردى تسيفرلى تەلەراديو حابار تاراتۋعا اۋىستىرۋ جۇمىستارىن جولعا قويدى. اقپارات جانە كوممۋنيكاتسيالار مينيسترلىگىنىڭ حابارلاۋىنشا, بيىل جىلدىڭ سوڭىندا بىرقاتار وبلىستا تسيفرلى حابار تاراتۋدى كەزەڭ-كەزەڭىمەن ەنگىزۋ باستالادى. ءبىرىنشى كەزەكتە, تۋرا التى ايدان سوڭ ماڭعىستاۋ وبلىسى كوشىرىلەدى, ال جەلتوقساندا جامبىل جانە وڭتۇستىك قازاقستان وبلىستارىن تسيفرلىق تەلەۆيزيامەن تولىق قامتۋ جوسپارالانۋدا.
وسىنىڭ ناتيجەسىندە حابار تاراتۋدا كورىنىس پەن دىبىستىڭ ساپاسى بارىنشا جوعارىلاپ, ەفيردەگى دىبىستىڭ تۇنىقتىعى قامتاماسىز ەتىلەدى. بۇعان قوسا, جوعارىدا ايتىپ وتكەنىمىزدەي, تسيفرلى جۇيە حالىققا وبلىس ورتالىقتارى مەن استانا جانە الماتى قالالارىندا 30 وتاندىق تەلەارنانى, سونداي-اق اۋىلدىق ەلدى مەكەندەردە 15 تەلەارنانى ابونەنتتىك وتەماقىسىز, ساپالى دەڭگەيدە كورۋگە مۇمكىندىك بەرەدى.
«قالعان وڭىرلەردە بۇل جۇيەنى ەنگىزۋ جۇمىستارى 2020 جىلدىڭ سوڭىنا دەيىن كەزەڭ-كەزەڭىمەن جۇرگىزىلەدى. بۇل جوبا «تسيفرلى قازاقستان» مەملەكەتتىك باعدارلاماسىن جۇزەگە اسىرۋ بويىنشا ءىس-شارالار جوسپارىنا ەنگىزىلگەن. ونىڭ اياسىندا 827 راديو جانە تەلەۆيزيا ستانساسىن سالۋ جانە جاڭعىرتۋ جۇمىستارى جوسپارلانعان», دەپ حابارلادى اقپارات جانە كوممۋنيكاتسيالار مينيسترلىگى.
بۇگىنگى كۇنى 356 ستانسا سالىنسا, جىلدىڭ سوڭىنا دەيىن تاعى 292 ستانسا قۇرىلىسىن اياقتاۋ جوسپارلانۋدا, وسى قادام حالىقتىڭ 94%-ىن تسيفرلى حابار تارالىمىمەن قامتۋعا مۇمكىندىك بەرمەك. قالعان 179 ستانسانى 2019-2020 جىلدارى پايدالانۋعا بەرۋ جوسپارلانۋدا. ايتا كەتۋ كەرەك, تسيفرلى جۇيەنى ەنگىزۋ بارىسىندا انالوگتىق حابار تاراتۋدى توقتاتۋ قاتار جۇرگىزىلىپ, بۇل جۇمىس جوسپار بويىنشا 2021 جىلى اياقتالماقشى.
ماماندار تۇپتەپ كەلگەندە, تسيفرلى حابار تاراتۋدى ەنگىزۋ اقپاراتتىق ءونىمنىڭ ساپاسىن ارتتىرۋعا عانا ەمەس, اقپاراتتىق كەڭىستىكتى بەكەمدەۋگە دە ۇلكەن سەپتىگىن تيگىزەتىنىن ايتادى. ەلىمىزدىڭ شەكارا ماڭىنداعى بىرقاتار ەلدى مەكەندەرىنىڭ كورشى ەلدەردىڭ تەلەارناسى مەن راديوسىن تۇتىنۋعا ءماجبۇر ەكەنى قوعامدا ءجيى ايتىلىپ جۇرگەنى بەلگىلى. تسيفرلى جۇيەنى ەنگىزۋ وسى ماسەلەنى شەشۋگە دە ىقپال ەتپەك.
قامبار احمەت, «ەگەمەن قازاقستان»